சங்கீதம் 5

¹கர்த்தாவே, என் வார்த்தைகளுக்குச் செவிகொடும், என் தியானத்தைக் கவனியும். ²நான் உம்மிடத்தில் விண்ணப்பம் பண்ணுவேன்: என் ராஜாவே, என் தேவனே, என் வேண்டுதலின் சத்தத்தைக் கேட்டருளும். ³கர்த்தாவே, காலையிலே என் சத்தத்தைக் கேட்டருளுவீர்: காலையிலே உமக்கு நேரே வந்து ஆயத்தமாகி, காத்திருப்பேன். ⁴நீர் துன்மார்க்கத்தில் பிரியப்படுகிற தேவன் அல்ல: தீமை உம்மிடத்தில் சேர்வதில்லை. ⁵வீம்புக்காரர் உம்முடைய கண்களுக்கு முன்பாக நிலைநிற்கமாட்டார்கள்: அக்கிரமக்காரர் யாவரையும் வெறுக்கிறீர். ⁶பொய் பேசுகிறவர்களை அழிப்பீர்: இரத்தப்பிரியனையும் சூதுள்ள மனுஷனையும் கர்த்தர் அருவருக்கிறார். ⁷நானோ உமது மிகுந்த கிருபையினாலே உமது ஆலயத்துக்குள் பிரவேசித்து. உமது பரிசுத்த சந்நிதிக்கு நேரே பயபக்தியுடன் பணிந்து கொள்ளுவேன். ⁸கர்த்தாவே, என் சத்துருக்களினிமித்தம் என்னை உம்முடைய நீதியிலே நடத்தி, எனக்குமுன்பாக உம்முடைய வழியைச் செவ்வைப்படுத்தும். ⁹அவர்கள் வாயில் உண்மை இல்லை, அவர்கள் உள்ளம் கேடுபாடுள்ளது: அவர்கள் தொண்டை திறக்கப்பட்ட பிரேதக்குழி: தங்கள் நாவினால் இச்சகம் பேசுகிறார்கள். ¹⁰தேவனே, அவர்களைக் குற்றவாளிகளாகத் தீரும்: அவர்கள் தங்கள் ஆலோசனைகளாலேயே விழும்படி செய்யும்: அவர்கள் துரோகங்களினுடைய திரட்சியினிமித்தம் அவர்களைத் தள்ளிவிடும்: உமக்கு விரோதமாய்க் கலகம்பண்ணினார்களே. ¹¹உம்மை நம்புகிறவர்கள் யாவரும் சந்தோஷித்து, எந்நாளும் கெம்பீரிப்பார்களாக: நீர் அவர்களைக் காப்பாற்றுவீர்: உம்முடைய நாமத்தை நேசிக்கிறவர்கள் உம்மில் களிகூருவார்களாக. ¹²கர்த்தாவே, நீர் நீதிமானை ஆசீர்வதித்து, காருணியம் என்னுங் கேடகத்தினால் அவனைச் சூழ்ந்துகொள்ளுவீர்.