சங்கீதம் 21

¹கர்த்தாவே, உம்முடைய வல்லமையிலே ராஜா மகிழ்ச்சியாயிருக்கிறார்: உம்முடைய இரட்சிப்பிலே எவ்வளவாய்க் களிகூருகிறார்! ²அவருடைய மனவிருப்பத்தின்படி நீர் அவருக்குத் தந்தருளி, அவருடைய உதடுகளின் விண்ணப்பத்தைத் தள்ளாதிருக்கிறீர். (சேலா.) ³உத்தம ஆசீர்வாதங்களோடு நீர் அவருக்கு எதிர்கொண்டுவந்து, அவர் சிரசில் பொற்கிரீடம் தரிப்பிக்கிறீர். ⁴அவர் உம்மிடத்தில் ஆயுசைக்கேட்டார்: நீர் அவருக்கு என்றென்றைக்குமுள்ள தீர்க்காயுசை அளித்தீர். ⁵உமது இரட்சிப்பினால் அவர் மகிமை பெரிதாயிருக்கிறது: மேன்மையையும் மகத்துவத்தையும் அவருக்கு அருளினீர். ⁶அவரை நித்திய ஆசீர்வாதங்களுள்ளவராக்குகிறீர்: அவரை உம்முடைய சமுகத்தின் மகிழ்ச்சியினால் பூரிப்பாக்குகிறீர். ⁷ராஜா கர்த்தர்மேல் நம்பிக்கையாயிருக்கிறார்: உன்னதமானவருடைய தயவினால் அசைக்கப்படாதிருப்பார். ⁸உமது கை உமது சத்துருக்களெல்லாரையும் எட்டிப்பிடிக்கும்: உமது வலதுகரம் உம்மைப் பகைக்கிறவர்களைக் கண்டுபிடிக்கும். ⁹உமது கோபத்தின் காலத்திலே அவர்களை அக்கினிச் சூளையாக்கிப் போடுவீர்: கர்த்தர் தமது கோபத்திலே அவர்களை அழிப்பார்: அக்கினி அவர்களைப் பட்சிக்கும். ¹⁰அவர்கள் கனியை பூமியிலிராதபடி நீர் அழித்து, அவர்கள் சந்ததியை மனுபுத்திரரிலிராதபடி ஒழியப்பண்ணுவீர். ¹¹அவர்கள் உமக்கு விரோதமாய்ப் பொல்லாங்கு நினைத்தார்கள்: தீவினையை எத்தனம்பண்ணினார்கள்: ஒன்றும் வாய்க்காமற்போயிற்று. ¹²அவர்களை இலக்காக வைத்து, உம்முடைய அம்புகளை நாணேற்றி அவர்கள் முகத்திற்கு நேரே விடுகிறீர். ¹³கர்த்தாவே, உம்முடைய பலத்திலே நீர் எழுந்தருளும்: அப்பொழுது உம்முடைய வல்லமையைப் பாடிக்கீர்த்தனம்பண்ணுவோம்.