யோபு 4

¹அப்பொழுது தேமானியனாகிய எலிப்பாஸ் பிரதியுத்தரமாக ²நாங்கள் உம்முடனே பேசத்துணிந்தால், ஆயாசப்படுவீரோ? ஆனாலும் பேசாமல் அடக்கிக்கொள்ளத்தக்கவன் யார் ? ³இதோ, நீர அநேகருக்கு புத்தி சொல்லி, இளைத்த கைகளைத் திடப்படுத்தினீர். ⁴விழுகிறவனை உம்முடைய வாரத்தைகளால் நிற்கப் பண்ணி, தள்ளாடுகிற முழங்கால்களைப் பலப்படுத்தினீர். ⁵இப்பொழுதோ துன்பம் உமக்கு நேரிட்டப்படியினால் ஆயாசப்படுகிறீர். அது உம்மைத் தொட்டதினால் கலங்குகிறீர். ⁶உம்முடைய தேவபக்தி உம்முடைய உறுதியாயும், உம்முடைய வழிகளின் உத்தமம் உம்முடைய நம்பிக்கையாயும் இருக்கவேண்டியதல்லவோ ? ⁷குற்றமில்லாமல் அழிந்தவன் உண்டோ? சன்மார்க்கர் அதம்பண்ணப்பட்டது எப்போ? இதை நினைத்துப் பாரும். ⁸நான் கண்டிருக்கிறபடி, அநியாயத்தை உழுது, தீவினையை விதைத்தவர்கள், அதையே அறுக்கிறார்கள். ⁹தேவனுடைய சுவாசத்தினாலே அவர்கள் அழிந்து, அவரடைய நாசியின் காற்றினாலே நிர்மூலமாகிறார்கள். ¹⁰சிங்கத்தின் கெர்ச்சிப்பும், துஷ்டசிங்கத்தின் முழக்கமும் அடங்கும். பாலசிங்கங்களின் பற்களும் தகர்ந்து போம். ¹¹கிழச்சிங்கம் இரையில்லாமையால் மாண்டுபோம், பாலசிங்கங்கள் சிதறுண்டுபோம். ¹²இப்போதும் ஒரு வார்த்தை என்னிடத்தில் இரகசியமாய் அறிவிக்கப்பட்டது, அதினுடைய மெல்லிய ஓசை என் செவியில் விழுந்தது. ¹³மனுஷர் மேல் அயர்ந்த நித்திரை இறங்குகையில், இராத்தரிசனங்களில் பலவித தோற்றங்கள் உண்டாகும்போது, ¹⁴திகிலும் நடுக்கமும் என்னைப் பிடித்தது, என் எலும்புகளெல்லாம் நடுங்கினது. ¹⁵அப்பொழுது ஒரு ஆவி என் முகத்துக்கு முன்பாக கடந்தது. என் உடலின் மயிர் சிலிர்த்தது. ¹⁶அது ஒரு உருப்போல என் கண்களுக்கு முன் நின்றது, ஆனாலும் அதின் ரூபம் இன்னதென்று விளங்கவில்லை. அமைதலுண்டாயிற்று, அப்பொழுது நான் கேட்ட சத்தமாவது ¹⁷மனுஷன் தேவனைப்பார்க்கிலும் நீதிமானாயிருப்பானோ? மனுபுத்திரன் தன்னை உண்டாக்கினவரைப்பார்க்கிலும் சுத்தமாயிருப்பானோ? ¹⁸கேளும், அவர் தம்முடைய பணிவிடைக்காரரிடத்தில் நம்பிக்கை வைப்பதில்லை. தம்முடைய தூதரின்மேலும் புத்தியீனத்தைச் சுமத்துகிறாரே, ¹⁹புழுதியில் அஸ்திபாரம்போட்டு, மண் வீடுகளில் வாசம்பண்ணி, பொட்டுப்பூச்சியால் அரிக்கப்படுகிறவர்கள்மேல் அவர் நம்பிக்கை வைப்பது எப்படி ? ²⁰காலைமுதல் மாலைவரைக்கும் மடிந்து, கவனிப்பார் ஒருவருமில்லாமல், நித்திய அழிவடைகிறார்கள். ²¹அவர்களிலிருக்கிற அவர்களுடைய மேன்மை போய்விடுமல்லவோ? ஞானமடையாமல் சாகிறார்களே என்று சொன்னான்.