யோபு 5

¹இப்போதும் கூப்பிடும், உமக்கு உத்தரவு கொடுப்பார் உண்டோ பார்ப்போம்? பரிசுத்தவான்களில் யாரை நோக்கிப் பார்ப்பீர் ? ²கோபம் நிர்மூடனைக் கொல்லும். பொறாமை புத்தியில்லாதவனை அதம் பண்ணும். ³நிர்மூடன் ஒருவன் வேரூன்றுகிறதை நான் கண்டு உடனே அவன் வாசஸ்தலத்தைச் சபித்தேன். ⁴அவன் பிள்ளைகள் இரட்சிப்புக்குத் தூரமாகித், தப்புவிப்பாரில்லாமல், வாசலிலே நொறுக்கப்பட்டார்கள். ⁵பசித்தவன் அவன் விளைச்சலை முட்செடிகளுக்குள்ளுமிருந்து பறித்துத் தின்றான். பறிகாரன் அவன் ஆஸ்தியை விழுங்கினான். ⁶தீங்கு புழுதியிலிருந்து உண்டாகிறதுமில்லை. வருத்தம் மண்ணிலிருந்து முளைக்கிறதுமில்லை. ⁷அக்கினிப் பொறிகள் மேலே பறக்கிறது போல, மனுஷன் வருத்தம் அனுபவிக்கப் பிறந்திருக்கிறான். ⁸ஆனாலும் நான் தேவனை நாடி, என் நியாயத்தை தேவனிடத்தில் ஒப்புவிப்னே. ⁹ஆராய்ந்து முடியாத பெரிய காரியங்களையும், எண்ணிமுடியாத அதிசயங்களையும் அவர் செய்கிறார். ¹⁰தாழ்ந்தவர்களை உயரத்தில் வைத்து, துக்கிக்கிறவர்களை இரட்சித்து உயர்த்துகிறார். ¹¹அவர் பூமியின் மழையை வருசிக்கப் பண்ணி, வெளிநிலங்களின் மேல் தண்ணீர்களை வருவிக்கிறார். ¹²தந்திரக்காரரின் கைகள் காரியத்தை முடிய நடத்தக்கூடாதபடிக்கு, அவர்களுடைய உபாயங்களை அவர் அபத்தமாக்குகிறார். ¹³அவர் ஞானிகளை அவர்களுடைய தந்திரத்திலே பிடிக்கிறார். திரியாவரக்காரரின் ஆலோசனை கவிழ்க்கப்படும். ¹⁴அவர்கள் பகற்காலத்திலே அந்தகாரத்திற்குள்ளாகி, மத்தியான வேளையிலே இரவில் தடவுகிறதுபோலத் தடவித் திரிகிறார்கள். ¹⁵ஆனாலும் எளியவனை அவர்கள் வாயிலிருக்கிற பட்டயத்துக்கும், பெலவானின் கைக்கும் விலக்கி இரட்சிக்கிறார். ¹⁶அதினால் தரித்திரனுக்கு நம்பிக்கை உண்டு. தீமையானது தன் வாயை மூடும். ¹⁷இதோ, தேவன் தண்டிக்கிற மனுஷன் பாக்கியவான். ஆகையால் சர்வவல்லவருடைய சிட்சையை அற்பமாக எண்ணாதிரும். ¹⁸அவர் காயப்படுத்திக் காயங்கட்டுகிறார். அவர் அடிக்கிறார், அவருடைய கை ஆற்றுகிறது. ¹⁹ஆறு இக்கட்டுகளுக்கு உம்மை நீங்கலாக்குவார். ஏழாவதிலும் பொல்லாப்பு உம்மைத் தொடாது. ²⁰பஞ்சகாலத்திலே அவர் உம்மை மரணத்துக்கும், யுத்தத்திலே பட்டயத்தின் வெட்டுக்கும் விலக்கி மீட்பார். ²¹நாவின் சவுக்குக்கும் மறைக்கப்படுவீர். பாழாக்குதல் வரும்போதும் பயப்படாமல் இருப்பீர். ²²பாழாக்குதலையும் பஞ்சத்தையும் பார்த்து நகைப்பீர். காட்டுமிருகங்களுக்கும் பயப்படாமலிருப்பீர். ²³வெளியின் கல்லுகளோடும் உமக்கு உடன்படிக்கையிருக்கும். வெளியின் மிருகங்களும் உம்மோடே சமாதானமாயிருக்கும். ²⁴உம்முடைய கூடாரம் சமாதானத்தோடிருக்கக் காண்பீர். உம்முடைய வாசஸ்தலத்தை விசாரிக்கும்போது குறைவைக் காணமாட்டீர். ²⁵உம்முடைய சந்தானம் பெருகி, உம்முடைய சந்ததியார் பூமியின் பூண்டுகளைப்போல இருப்பார்கள் என்பதை அறிந்து கொள்வீர். ²⁶தானியம் ஏற்றகாலத்திலே அம்பாரத்தில் சேருகிறது போல, முதிர்வயதிலே கல்லறையில் சேருவீர். ²⁷இதோ, நாங்கள் ஆராய்ந்து அறிந்தது இதுதான். காரியம் இப்படியிருக்கிறது. இதை நீர் கேட்டு உமக்கு நன்மையுண்டாக அறிந்துகொள்ளும் என்றான்.