லூக்கா 3

¹திபேரியுராயன் ராஜ்யபாரம் பண்ணின பதினைந்தாம் வருஷத்திலே, பொந்தியுபிலாத்து யூதேயாவுக்குத் தேசாதிபதியாயும், ஏரோது காற்பங்கு தேசமாகிய கலிலேயாவுக்கு அதிபதியாயும், அவன் சகோதரனாகிய பிலிப்பு காற்பங்கு தேசமாகிய இத்துரேயாவுக்கும் திராகொனித்தி நாட்டிற்கும் அதிபதியாயும், லிசானியா காற்பங்கு தேசமாகிய அபிலேனேக்கு அதிபதியாயும், ²அன்னாவும் காய்பாவும் பிரதான ஆசாரியராயும் இருந்தகாலத்தில் வனாந்தரத்திலே சகரியாவின் குமாரனாகிய யோவானுக்குத் தேவனுடைய வார்த்தை உண்டாயிற்று. ³அப்பொழுது கர்த்தருக்கு வழியை ஆயத்தப்படுத்துங்கள், அவருக்குப் பாதைகளைச் செவ்வைபண்ணுங்கள் என்றும், ⁴பள்ளங்களெல்லாம் நிரப்பப்படும், சகல மலைகளும் குன்றுகளும் தாழ்த்தப்படும், கோணலானவைகள் செவ்வையாகும், கரடானவைகள் சமமாகும் என்றும், ⁵மாம்சமான யாவரும் தேவனுடைய இரட்சிப்பைக் காண்பார்கள் என்றும், வனாந்தரத்திலே கூப்பிடுகிறவனுடைய சத்தம் உண்டாகும் என்று ஏசாயா தீர்க்கதரிசியின் ஆகமத்தில் எழுதியிருக்கிறபிரகாரம், ⁶அவன் யோர்தான் நதிக்கு அருகான தேசமெங்கும் போய், பாவமன்னிப்புக்கென்று மனந்திரும்புதலுக்கேற்ற ஞானஸ்நானத்தைக்குறித்துப் பிரசங்கித்தான். ⁷அவன், தன்னிடத்தில் ஞானஸ்நானம் பெறும்படிக்குப் புறப்பட்டுவந்த திரளான ஜனங்களை நோக்கி விரியன்பாம்புக் குட்டிகளே! வருங்கோபத்துக்குத் தப்பித்துக்கொள்ள உங்களுக்கு வகைகாட்டினவன் யார்? ⁸மனந்திரும்புதலுக்கு ஏற்ற கனிகளைக் கொடுங்கள்: ஆபிரகாம் எங்களுக்குத் தகப்பன் என்று உங்களுக்குள்ளே சொல்லத்தொடங்காதிருங்கள்: தேவன் இந்தக் கல்லுகளினாலே ஆபிரகாமுக்குப் பிள்ளைகளை உண்டுபண்ண வல்லவராயிருக்கிறார் என்று உங்களுக்குச் சொல்லுகிறேன். ⁹இப்பொழுதே கோடரியானது மரங்களின் வேர் அருகே வைத்திருக்கிறது: ஆகையால் நல்ல கனிகொடாத மரமெல்லாம் வெட்டுண்டு அக்கினியிலே போடப்படும் என்றான். ¹⁰அப்பொழுது ஜனங்கள் அவனை நோக்கி அப்படியானால் நாங்கள் என்ன செய்யவேண்டும் என்று கேட்டார்கள். ¹¹அவர்களுக்கு அவன் பிரதியுத்தரமாக இரண்டு அங்கிகளையுடையவன் இல்லாதவனுக்குக் கொடுக்கக்கடவன்: ஆகாரத்தை உடையவனும் அப்படியே செய்யக்கடவன் என்றான். ¹²ஆயக்காரரும் ஞானஸ்நானம் பெறவந்து, அவனை நோக்கி போதகரே, நாங்கள் என்னசெய்யவேண்டும் என்று கேட்டார்கள். ¹³அதற்கு அவன் உங்களுக்குக் கட்டளையிட்டிருக்கிறதற்கு அதிகமாய் ஒன்றும் வாங்காதிருங்கள் என்றான். ¹⁴போர்ச்சேவகரும் அவனை நோக்கி நாங்கள் என்னசெய்யவேண்டும் என்று கேட்டார்கள். அதற்கு அவன் நீங்கள் ஒருவருக்கும் இடுக்கண்செய்யாமலும் பொய்யாய்க் குற்றஞ்சாட்டாமலும், உங்கள் சம்பளமே போதுமென்றும் இருங்கள் என்றான். ¹⁵யோவானைக்குறித்து இவன்தான் கிறிஸ்துவோ என்று ஜனங்களெல்லாரும் எண்ணங்கொண்டு, தங்கள் இருதயங்களில் யோசனையாயிருக்கையில், ¹⁶யோவான் எல்லாருக்கும் பிரதியுத்தரமாக நான் ஜலத்தினால் உங்களுக்கு ஞானஸ்நானங் கொடுக்கிறேன், என்னிலும் வல்லவர் ஒருவர் வருகிறார், அவருடைய பாதரட்சைகளின் வாரை அவிழ்க்கிறதற்கும் நான் பாத்திரன் அல்ல, அவர் பரிசுத்தஆவியினாலும் அக்கினியினாலும் உங்களுக்கு ஞானஸ்நானங் கொடுப்பார். ¹⁷தூற்றுக்கூடை அவர் கையில் இருக்கிறது, அவர் தமது களத்தை நன்றாய் விளக்கி, கோதுமையைத் தமது களஞ்சியத்தில் சேர்ப்பார்: பதரையோ அவியாத அக்கினியினால் சுட்டெரிப்பார் என்றான். ¹⁸வேறு அநேக புத்திமதிகளையும் அவன் ஜனங்களுக்குச் சொல்லிப் பிரசங்கித்தான். ¹⁹காற்பங்கு தேசாதிபதியாகிய ஏரோது தன் சகோதரனான பிலிப்புவின் மனைவி ஏரோதியாளினிமித்தமாகவும், தான் செய்த மற்றப் பொல்லாங்குகளினிமித்தமாகவும், யோவானாலே கடிந்து கொள்ளப்பட்டபோது, ²⁰தான் செய்த மற்றெல்லாப் பொல்லாங்குகளும் தவிர, யோவானையும் காவலில் அடைத்துவைத்தான். ²¹ஜனங்களெல்லாரும் ஞானஸ்நானம் பெற்றபோது, இயேசுவும் ஞானஸ்நானம் பெற்று, ஜெபம்பண்ணுகையில், வானம் திறக்கப்பட்டது: ²²பரிசுத்த ஆவியானவர் ரூபங்கொண்டு புறாவைப்போல அவர்மேல் இறங்கினார். வானத்திலிருந்து ஒரு சத்தமும் உண்டாகி நீர் என்னுடைய நேசகுமாரன், உம்மில் பிரியமாயிருக்கிறேன் என்று உரைத்தது. ²³அப்பொழுது இயேசு ஏறக்குறைய முப்பது வயதுள்ளவரானார். அவர் யோசேப்பின் குமாரனென்று எண்ணப்பட்டார். அந்த யோசேப்பு ஏலியின் குமாரன்: ²⁴ஏலி மாத்தாத்தின் குமாரன்: மாத்தாத் லேவியின் குமாரன்: லேவி மெல்கியின் குமாரன்: மெல்கி யன்னாவின் குமாரன்: யன்னா யோசேப்பின் குமாரன்: ²⁵யோசேப்பு மத்தத்தியாவின் குமாரன்: மத்தத்தியா ஆமோசின் குமாரன்: ஆமோஸ் நாகூமின் குமாரன்: நாகூம் எஸ்லியின் குமாரன்: எஸ்லி நங்காயின் குமாரன். ²⁶நங்காய் மாகாத்தின் குமாரன்: மாகாத் மத்தத்தியாவின் குமாரன்: மத்தத்தியா சேமேயின் குமாரன்: சேமேய் யோசேப்பின் குமாரன்: யோசேப்பு யூதாவின் குமாரன்: யூதா யோவன்னாவின் குமாரன். ²⁷யோவன்னா ரேசாவின் குமாரன்: ரேசா சொரொபாபேலின் குமாரன்: சொரொபாபேல் சலாத்தியேலின் குமாரன்: சலாத்தியேல் நேரியின் குமாரன். ²⁸நேரி மெல்கியின் குமாரன்: மெல்கி அத்தியின் குமாரன்: அத்தி கோசாமின் குமாரன்: கோசாம் எல்மோதாமின் குமாரன்: எல்மோதாம் ஏரின் குமாரன்: ஏர் யோசேயின் குமாரன். ²⁹யோசே எலியேசரின் குமாரன்: எலியேசர் யோரீமின் குமாரன்: யோரீம் மாத்தாத்தின் குமாரன்: மாத்தாத் லேவியின் குமாரன். ³⁰லேவி சிமியோனின் குமாரன்: சிமியோன் யூதாவின் குமாரன்: யூதா யோசேப்பின் குமாரன்: யோசேப்பு யோனானின் குமாரன்: யோனான் எலியாக்கீமின் குமாரன். ³¹எலியாக்கீம் மெலெயாவின் குமாரன்: மெலெயா மயினானின் குமாரன்: மயினான் மாத்தாத்தாவின் குமாரன்: மாத்தாத்தா நாத்தானின் குமாரன்: நாத்தான் தாவீதின் குமாரன். ³²தாவீது ஈசாயின் குமாரன்: ஈசாய் ஓபேதின் குமாரன்: ஓபேத் போவாசின் குமாரன்: போவாஸ் சல்மோனின் குமாரன்: சல்மோன் நகசோனின் குமாரன். ³³நகசோன் அம்மினதாபின் குமாரன்: அம்மினதாப் ஆராமின் குமாரன்: ஆராம் எஸ்ரோமின் குமாரன்: எஸ்ரோம் பாரேசின் குமாரன்: பாரேஸ் யூதாவின் குமாரன்: யூதா யாக்கோபின் குமாரன். ³⁴யாக்கோபு ஈசாக்கின் குமாரன்: ஈசாக்கு ஆபிரகாமின் குமாரன்: ஆபிரகாம் தேராவின் குமாரன்: தேரா நாகோரின் குமாரன். ³⁵நாகோர் சேரூக்கின் குமாரன்: சேரூக் ரெகூவின் குமாரன்: ரெகூ பேலேக்கின் குமாரன்: பேலேக் ஏபேரின் குமாரன்: ஏபேர் சாலாவின் குமாரன். ³⁶சாலா காயினானின் குமாரன்: காயினான் அர்ப்பகசாத்தின் குமாரன்: அர்ப்பகசாத் சேமின் குமாரன்: சேம் நோவாவின் குமாரன்: நோவா லாமேக்கின் குமாரன். ³⁷லாமேக்கு மெத்தூசலாவின் குமாரன்: மெத்தூசலா ஏனோக்கின் குமாரன்: ஏனோக்கு யாரேதின் குமாரன்: யாரேத் மகலாலெயேலின் குமாரன்: மகலாலெயேல் கேனானின் குமாரன்: கேனான் ஏனோசின் குமாரன். ³⁸ஏனோஸ் சேத்தின குமாரன்: சேத் ஆதாமின் குமாரன்: ஆதாம் தேவனால் உண்டானவன்.