ஓசியா 14

¹இஸ்ரவேலே, உன் தேவனாகிய கர்த்தரிடத்தில் திரும்பு, நீ உன் அக்கிரமத்தினால் விழுந்தாய். ²வார்த்தைகளைக் கொண்டு கர்த்தரிடத்தில் திரும்புங்கள், அவரை நோக்கி தேவரீர் எல்லா அக்கிரமத்தையும் நீக்கி, எங்களைத் தயவாய் அங்கீகரித்தருளும், அப்பொழுது நாங்கள் எங்கள் உதடுகளின் காளைகளைச் செலுத்துவோம். ³அசீரியா எங்களை இரட்சிப்பதில்லை, நாங்கள் குதிரைகளின்மேல் ஏற மாட்டோம், எங்கள் கைகளின் கிரியையைப் பார்த்து நீங்கள் எங்கள் தேவர்கள் என்று இனிச் சொல்லமாட்டோம், திக்கற்றவன் உம்மிடத்தில் இரக்கம் பெறுகிறான் என்று சொல்லுங்கள். ⁴நான் அவர்கள் சீர்கேட்டைக் குணமாக்குவேன், அவர்களை மனப்பூர்வமாய் சிநேகிப்பேன், என் கோபம் அவர்களைவிட்டு நீங்கிற்று. ⁵நான் இஸ்ரவேலுக்குப் பனியைப்போலிருப்பேன், அவன் லீலிப் புஸ்பத்தைப்போல் மலருவான், லீபனோனைப் போல் வேரூன்றி நிற்பான். ⁶அவன் கிளைகள் ஓங்கிப் படரும்,அவன் அலங்காரம் ஒலிவ மரத்தினுடைய அலங்காரத்தைப் போலவும், அவனுடைய வாசனை லீபனோனுடைய வாசனையைப் போலவும் இருக்கும். ⁷அவன் நிழலில் குடியிருக்கிறவர்கள் திரும்புவார்கள், தானிய விளைச்சலைப்போலச் செழித்து, திராட்சச் செடிகளைப்போலப் படருவார்கள், அவன் வாசனை லீபனோனுடைய திராட்சரசத்தின் வாசனையைப் போல இருக்கும். ⁸இனி எனக்கும் விக்கிரகங்களுக்கும் என்ன என்று எப்பிராயீம் சொல்லுவான், நான் அவனுக்குச் செவிகொடுத்து, அவன் மேல் நோக்கமாயிருந்தேன், நான் பச்சையான தேவதாரு விருட்சம் போலிருக்கிறேன், என்னாலே உன் கனியுண்டாயிற்று என்று எப்பிராயீம் சொல்லுவான். ⁹இவைகளை உணரத்தக்க ஞானமுள்ளவன் யார்? இவைகளைக் கிரகிக்கத்தக்க புத்தியுள்ளவன் யார்? கர்த்தருடைய வழிகள் செம்மையானவைகள், நீதிமான்கள் அவைகளில் நடப்பார்கள், பாதகரோவென்றால் அவைகளில் இடறி விழுவார்கள்.